sponsor

sponsor

Suu Tov KhmerKrom (mysong myvoice)

Sunday, September 7

ពិធី​ផ្សព្វផ្សាយ​ទិនានុប្បវត្តិ​ ឧត្ដម​សិក្សា​នៅ​ភ្នំពេញ​ ឆ្នាំ​២០០៧


រាជធានី​ភ្នំពេញ​ ៖​ ទី​ភ្នាក់ងារ​ឧត្ដម​សិក្សា​នៃ​ប្រទេស​ប្រើ​ភាសា​បារាំង​ (AUF)​ សភា​ពាណិជ្ជកម្ម​បារាំង​ -​ កម្ពុជា​ (CCFC)​ រួម​ជា​មួយ​នឹង​ផ្នែក​សហប្រតិបត្តិការ​បារាំង ​របស់​មហាវិទ្យាល័យ​សេដ្ឋកិច្ច ​នៃ​សាកល​វិទ្យាល័យ​ភូមិន្ទ​នីតិសាស្ត្រ​ និង​វិទ្យាសាស្ត្រ​សេដ្ឋកិច្ច​មាន​កិត្តិយស​ នឹង​បង្ហាញ​ជូន​នូវ​សៀវភៅ​មគ្គុទេសក៍​សាកល​វិទ្យាល័យ​នៅ​រាជធានី​ភ្នំពេញ​ ឆ្នាំ​២០០៧​ ដែល​ជា​ស្នាដៃ​លើក​ទី​មួយ​ ដំបូង​បំផុត​នៅ​កម្ពុជា​ ។​ ទិនានុប្បវត្តិ​មគ្គទេសក៍​សាកល​វិទ្យាល័យ​ដែល​ពុំ​ដែល​មាន​នៅ​កម្ពុជា​នេះ​ នឹង​នាំ​មក​នូវ​កម្មវិធី​បណ្ដុះបណ្ដាល​ថ្នាក់​ឧត្ដម​សិក្សា​នានា​ទីក្រុង​ ភ្នំពេញ​ ដោយ​ក្នុង​នោះ​មាន​ទាំង​គ្រឹះស្ថាន​ឧត្ដមសិក្សា​សាធារណៈ​ និង​ឯកជន​ ។

ស្នាដៃ​នេះ​ពិត​ជា​មាន​ប្រយោជន៍​ ឆ្លើយ​តប​នឹង​សេចក្ដី​ត្រូវ​ការ​របស់​សិស្ស​ និង​និស្សិត​ ព្រមទាំង​និយោជក​ទាំងឡាយ​ដែល​ចង់​ស្វែង​រក​ព័ត៌មាន​លំអិត​ទាក់ទង​ដល់​ ប្រព័ន្ធ​នៃ​ការ​អប់រំ​បណ្ដុះបណ្ដាល​ និង​ប្រភេទ​សញ្ញាប័ត្រ​នានា​នៅ​កម្ពុជា​ ។​ ទិនានុប្បវត្តិ​នេះ​នឹង​បង្ហាញ​ជូន​នូវ​គ្រឹះស្ថាន​ឧត្ដម​សិក្សា​សាធារណៈ​ និង​ឯកជន​ចំនួន​២៩​ ដែល​កំពុង​មាន​វត្តមាន​នៅ​រាជធានី​ភ្នំពេញ​ ។​ ទិនានុប្បវត្តិ​មួយ​ក្បាល​នេះ​តំណាង​អោយ​និស្សិត​ចំនួន​៧៦.៦០០​នាក់​ និង​ប្រភេទ​សញ្ញាប័ត្រ​ចំនួន​៤២៨​ ប្រភេទ​នៅ​កម្ពុជា​ ។

ទិនានុប្បវត្តិ​នេះ​ធ្វើ​ឡើង​ជា​ពីរ​ភាសា​បារាំង​ -​ អង់គ្លេស​ ដែល​ចែក​ចេញ​ជា​ពីរ​ផ្នែក​ ៖

-​ តារាង​ព័ត៌មាន​ស្ដី​ពី​គ្រឹះស្ថាន​បណ្ដុះបណ្ដាល​នីមួយៗ​ ។
-​ បញ្ជី​រាយ​នាម​កម្រិត​សញ្ញាប័ត្រ​តាម​ជំនាញ​នីមួយៗ​ ។
កម្រិត​សញ្ញាប័ត្រ​ដែល​បាន​ដកស្រង់​មក​បង្ហាញ​ ត្រូវ​បាន​បែងចែក​ជា​៨​ផ្នែក​ ៖
-​ វិទ្យាសាស្ត្រ​សង្គម​ ៖​ សេដ្ឋកិច្ច​ គ្រប់គ្រង​ នីតិសាស្ត្រ​ រដ្ឋបាល​ ។
-​ មនុស្ស​សាស្ត្រ​ ៖ ​ ប្រវត្តិសាស្ត្រ​ បុរាណ​វិទ្យា​ ចិត្តវិទ្យា​ សង្គមវិទ្យា​ នគរ​រូបនីយវិទ្យា​ ស្ថាបត្យកម្ម​ ភាសាវិទ្យា​ ទំនាក់ទំនង​ ព័ត៌មាន​ និង​ទេសចរណ៍​ ។
-​ សិល្បៈ​ ៖​ សិល្បៈ​ ប្លាស្ទិក​ តូរ្យ​តន្ត្រី​ និង​វិចិត្រ​សិល្បៈ
-​ ភាសា​ និង​អក្សរសាស្ត្រ​ ៖​ ខ្មែរ​ បារាំង​ អង់គ្លេស​ ជប៉ុន​ ។
-​ វិទ្យាសាស្ត្រ​អប់រំ​ ៖​ គរុកោសល្យ
-​ វិទ្យាសាស្ត្រ​សុខាភិបាល​ ៖​ វេជ្ជសាស្ត្រ​ទូទៅ​ វេជ្ជសាស្ត្រ​រោគ​កុមារ​ ទន្តសាស្ត្រ​ ចក្ខុ​សាស្ត្រ​ ឱសថសាស្ត្រ​ ជំនាញ​ថែទាំ​វេជ្ជសាស្ត្រ....​ ។ល។
-​ វិទ្យាសាស្ត្រ​វិស្វករ​ ៖​ រូបវិទ្យា​ គីមីវិទ្យា​ ទេពកោសល្យ​ខាង​ចំណីអាហារ​ កសិ​ចំណីអាហារ​ ព័ត៌មាន​វិទ្យា​ គណិតវិទ្យា...។ល។
-​ កសិកម្ម​ ៖​ រៀបចំ​ដែនដី​ កសិវិទ្យា​ កសិ​សេដ្ឋសាស្ត្រ​ កសិឧស្សាហកម្ម...។ល។

ទិន្នន័យ​ទាំងឡាយ​ក្នុង​ទិនានុប្បវត្តិ​នេះ​ត្រូវ​បាន​ប្រមូល​ និង​ចងក្រង​ឡើង​ក្នុង​អំឡុង​ពី​ខែ​កុម្ភៈ​ ដល់​ខែ​ឧសភា​ ឆ្នាំ​២០០៧​ ក្រោម​ស្នាដៃ​របស់​និស្សិត​ថ្នាក់​បរិញ្ញាបត្រ​ នៃ​មហាវិទ្យាល័យ​វិទ្យាសាស្ត្រ​សេដ្ឋកិច្ច​ និង​គ្រប់គ្រង​នៃ​សាកលវិទ្យាល័យ​លីយ៉ុង​២​ របស់​ប្រទេស​បារាំង​ ដែល​បោះ​ទីតាំង​នៅ​សាកលវិទ្យាល័យ​ភូមិន្ទ​នីតិសាស្ត្រ​ និង​វិទ្យាសាស្ត្រ​សេដ្ឋកិច្ច​នៅ​ភ្នំពេញ​ ។

នា​ថ្ងៃ​អង្គារ​ ទី​១៣​ ខែ​វិច្ឆិកា​ ឆ្នាំ​២០០៧​ ខាងមុខ​នេះ​នៅ​សាកលវិទ្យាល័យ​ភូមិន្ទ​នីតិសាស្ត្រ​ និង​វិទ្យាសាស្ត្រ​សេដ្ឋកិច្ច​ នឹង​មាន​រៀបចំ​ពិធី​ដាក់​បង្ហាញ​ទិនានុប្បវត្តិ​មគ្គទេសក៍​ឧត្ដម​សិក្សា​ ឆ្នាំ​២០០៧​ ដោយ​មាន​ការ​អញ្ជើញ​ចូល​រួម​ពី​សំណាក់​ លោក​ពិត ចំណាន​ រដ្ឋលេខាធិការ​ក្រសួង​អប់រំ​ យុវជន​ និង​កីឡា​ ព្រមទាំង​លោក​ ហ្សង់ ហ្រ្វង់ស័រ - ដេម៉ាឌ្សែរ​ ឯកអគ្គរដ្ឋទូត​នៃ​ប្រទេស​បារាំង​ប្រចាំ​នៅ​កម្ពុជា​ផង​ដែរ​ ។​ នៅ​ក្នុង​ឱកាស​នោះ​ នឹង​មាន​ការ​ចែក​ជូន​ទិនានុប្បវត្តិ​ចំនួន​១​ច្បាប់​ ដល់​អ្នក​ដែល​បាន​អញ្ជើញ​ចូលរួម​ ហើយ​លើស​ពី​នេះ​ សៀវភៅ​នេះ​ក៏​អាច​ត្រូវ​បាន​ដាក់​ជូន​ជាវ​ក្នុង​តម្លៃ​២​ដុល្លារ​ផង​ដែរ​ ៕

Read more!

សម្លាប់​ប្រពន្ធ​ ខឹង​ទារ​លុយ​៥០​ម៉ឺន​រៀល​មិន​បាន


ខេត្ត​ព្រៃវែង​៖ ស្ត្រី​ម្នាក់​ត្រូវ​បាន​បុរស​ជា​ប្ដី​ ច្របាច់​ក​សម្លាប់​ក្នុង​ទឹក​ស្ទឹង កាល​ពី​ថ្ងៃ​ទី​២ ខែ​វិច្ឆិកា នៅ​ក្នុង​ភូមិ​បឹងកក់ ឃុំ​ដូនកឹង ស្រុក​កំចាយមារ ខេត្ត​ព្រៃ​វែង ទោះ​បី​ជា​បែប​ណា ប្ដី​ជា​ឃាតករ​ក៏​ត្រូវ​បាន​សមត្ថកិច្ច​ប៉ូលិស​នៃ​ស្នង​ការដ្ឋាន​ខេត្ត​ ព្រៃវែង ធ្វើការ​ឃាត់​ខ្លួន​រួច​ហើយ​ដែរ ។ ស្ត្រី​ដែល​ស្លាប់​ដោយ​ស្នាដៃ​បុរស​ជា​ប្ដី​នេះ​ឈ្មោះ​មាស ស្រីថា អាយុ​២៧​ឆ្នាំ ឯ​ប្ដី​ជា​ឃាតករ​ឈ្មោះ​ឆយ ពេជ្រ អាយុ​២៩​ឆ្នាំ ។

ទាក់​ទិន​នឹង​រឿង​ហេតុ​ខាង​លើ​នេះ ត្រូវ​បាន​អ្នក​ស្រុក​រស់​នៅ​ជា​មួយ​គ្នា​រៀប​រាប់​ឲ្យ​ដឹង​ថា នៅ​វេលា​ម៉ោង​៦ និង​៣០​នាទី​ព្រឹក​ថ្ងៃ​ទី​២ វិច្ឆិកា ក្រុម​អ្នក​ទៅ​នេសាទ​ត្រី​នៅ​បឹង​កក់​ប្រទះ​ឃើញ​សព នាង​មាស ស្រីថា អណ្ដែត​នៅ​ក្នុង​ស្ទឹង​ជាប់​ទំនប់​បឹងកក់ ដោយ​មាន​សភាព​ស្លេក​ស្លាំង​ដែល​មាន​ន័យ​ថា បាន​ស្លាប់​យូរ​ម៉ោង​ហើយ ។ ពេល​ឃើញ​សព​អណ្ដែត​ទឹក​បែប​នេះ អ្នក​នេសាទ​បាន​រត់​ទៅ​ភូមិ ប្រាប់​ជា​ព័ត៌មាន​ឲ្យ​ក្រុម​គ្រួសារ បាន​ដឹង​ តែ​ពេល​នោះ បុរស​ជា​ប្ដី​នារី​រង​គ្រោះ​កំពុង​ដើរ​ប្រាប់​គេ​ឯង​ថា ខ្លួន​បាន​ច្របាច់​ក​ប្រពន្ធ សម្លាប់​ចោល​នៅ​មាត់​ស្ទឹង​បាត់​ទៅ​ហើយ នៅ​ពេល​នាំ​ទៅ​រក​ត្រី ។

តាម​ប្រភព​ព័ត៌មាន​ថា ប្ដី​ជា​ឃាតករ​បាន​ប្រាប់​គេ​ឯង​ទៀត​ថា បាន​ជា​ខ្លួន​ច្របាច់​ក ប្រពន្ធ​សម្លាប់​ចោល ក៏​ព្រោះ​តែ​ខឹង​ប្រពន្ធ​មិន​ឲ្យ​លុយ​៥០​ម៉ឺន​រៀល ធ្វើ​សោហ៊ុយ​ទៅ​ធ្វើ​កម្មករ​នៅ​ប្រទេស​ថៃ ។ ខ្លួន​មាន​ការ​ប៉ុន​ប៉ង​សម្លាប់​ចំនួន​២​លើក​មក​ហើយ ប៉ុន្តែ​រក​ពេល​វេលា​មិន​បាន ទើប​តែ​ថ្ងៃ​នេះ ខ្លួន​បាន​បបួល​ប្រពន្ធ​ទៅ​រក​ត្រី​ចំ​ពេល​ស្ងាត់​ ក៏​សម្លាប់​តែ​ម្ដង​ទៅ ។ អ្នក​ភូមិ​បឹង​កក់​និយាយ​ទៀត​ថា ប្ដី​ជា​ឃាតករ​រូប​នេះ​មិន​សូវ​នៅ​ផ្ទះ​ទេ គឺ​ច្រើន​ទៅ​ធ្វើ​កម្មករ​នៅ​ប្រទេស​ថៃ ហើយ​ទើប​ត្រឡប់​មក​វិញ​ទៀត​ផង ។ កាល​ពី​ស្ត្រី​ជា​ប្រពន្ធ​នៅ​រស់​នាង​តែង​តែ​ និយាយ​ប្រាប់​អ្នក​ស្រុក​ថា ប្ដី​ទៅ​ធ្វើ​ការ​នៅ​ថៃ មិន​ដែល​បាន​លុយ​មក​ផ្ទះ​ទេ លុះ​ពេល​ទៅ​វិញ​សុំ​លុយ​ពុំ​ដែល​ខាន តែ​នាង​មិន​ដែល​ឲ្យ ក៏​កើត​មាន​គំនុំ​ប៉ង​សម្លាប់​បែប​នេះ ។

តាម​ប្រភព​ព័ត៌មាន​ថា បុរស​ជា​ប្ដី​ក៏​ជា​មនុស្ស​ប្រឡូក​នឹង​គ្រឿង​ញៀន​ជោក​ជាំ​ណាស់​ដែរ ដែល​គ្មាន​អ្នក​ណា​អាច​និយាយ​ណែនាំ​បាន​ឡើយ ។ អ្នក​ស្រុក​និយាយ​ថា ប្រពន្ធ​ត្រូវ​បាន​ប្ដី​ច្របាច់​ក​សម្លាប់ ហើយ​ប្ដី​ជា​ឃាតករ​ ក៏​ត្រូវ​បាន​សមត្ថកិច្ច​ចាប់​ខ្លួន​ដាក់​គុក​ទៀត នៅ​សល់​កូន​ស្រី​ម្នាក់​អាយុ​ទើប​តែ​ប្រហែល​៥​ឆ្នាំ កំពុង​រស់​នៅ​កណ្ដោច​កណ្ដែង​ផ្ញើ​ខ្លួន​លើ​សាច់​ញាតិ និង​អ្នក​ស្រុក ៕

Read more!

ពលរដ្ឋ​រស់​នៅ​តំបន់​បឹងកក់​


ប្រជាពលរដ្ឋ ​ជាង ១០០​នាក់ រស់នៅ​ក្នុង​តំបន់​បឹងកក់ បាន​មក​ប្រមូល​ផ្ដុំ​គ្នា​នៅមុខ​សាលាក្រុង​ភ្នំពេញ នា​ព្រឹក​ថ្ងៃ​ទី​១ កញ្ញា ហើយ​បាន​ប្រគល់​ញត្តិ ស្នើសុំ​ឲ្យ​សាលាក្រុង​ផ្អាក​សកម្មភាព​បូម​ខ្សាច់​លុប​បឹងកក់​ដោយ​ក្រុមហ៊ុន ស៊ូកាគូ អ៊ីន ហើយ​ទាមទារ​ឲ្យ​ក្រុមហ៊ុន​ចុះ​មក​ដោះស្រាយ​បញ្ហា​ប្រាក់​សំណង​ដោយ​ផ្ទាល់​ ជាមួយ​នឹង​ប្រជាពលរដ្ឋ។

RFA Photo/Chea Makara
ពលរដ្ឋ ​រស់​នៅ​តំបន់​បឹងកក់​នាំ​គ្នា​មក​តវ៉ា​នៅ​មុខ​សាលាក្រុង​ភ្នំពេញ​នា​ថ្ងៃ​ ទី​១ កញ្ញា ២០០៨ ដើម្បី​ទាមទារ​ឲ្យ​មាន​ការដោះស្រាយ​សំណង​ជា​ថ្នូរ​នឹង​ការ​រើ​ចេញ​ពី​តំបន់​ បឹង​កក់។

ក្រុម​ប្រជាពលរដ្ឋ​រស់នៅ​តំបន់​បឹងកក់ សង្កាត់​ស្រះចក ខណ្ឌ​ដូនពេញ បាន​ឡើង​មក​តវ៉ា​ដោយ​ពួក​គាត់​អះអាង​នឹង​មិន​ទទួល​យក​ប្រាក់​សំណង​ដែល​ ក្រុមហ៊ុន​បាន​ប្រគល់​ឲ្យ​តាមរយៈ​សាលាក្រុង​ភ្នំពេញ​ចំនួន ៨​ពាន់​ដុល្លារ​ក្នុង​មួយ​គ្រួសារ​នោះ​ឡើយ ហើយ​ទាមទារ​ឲ្យ​ក្រុមហ៊ុន​ផ្ដល់​ប្រាក់​សំណង​សមរម្យ​ស្របតាម​តម្លៃ​ទីផ្សារ។

តំណាង​ប្រជាពលរដ្ឋ អ្នកស្រី បេ ផារ៉ុម ដែល​បាន​ចូលនាំ​យក​ញត្តិ​និង​ស្នាម​មេដៃ​របស់​ប្រជាពលរដ្ឋ​ជាង ៣០០​នាក់ ដាក់​ជូន​សាលាក្រុង​ភ្នំពេញ បាន​មាន​ប្រសាសន៍​ថា ពលរដ្ឋ​ដែល​នាំ​គ្នា​មក​តវ៉ា​នោះ មិន​មាន​ការទុក​ចិត្ត​ចំពោះ​ការដោះស្រាយ​របស់​សាលាក្រុង​ឡើយ។

អ្នកស្រី បេ ផារ៉ុម មាន​ប្រសាសន៍​ដូច្នេះ​ថា ៖ «ប្រជាពលរដ្ឋ​ទាំង​ អស់ ​គ្នា សុំ​ឲ្យ​ក្រុមហ៊ុន​ចុះ​ផ្ទាល់​តែ​ម្ដង​ថា ឥឡូវ​យក​ប៉ុន្មាន​បាន អី​ប៉ុន្មាន។ សាលាក្រុង​គ្រាន់តែ​មាន​តួនាទី​មួយ គ្រាន់តែ​ទទួល​ស្គាល់​ថា ប្រជាពលរដ្ឋ​និង​ក្រុមហ៊ុន បាន​ជួប​គ្នា​ហើយ។ គឺ​ចង់​បាន​អ៊ីចឹង​តែ​ម្ដង។ បាន​ខ្ញុំ​ចង់​និយាយ​អ៊ីចឹង ព្រោះ​ប្រជាពលរដ្ឋ ជួនកាល​ក្រុមហ៊ុន​គេ​ឲ្យ ២​ម៉ឺន ៣​ម៉ឺន​មក ស្រាប់​ដល់​ហើយ សង្កាត់ ភូមិ​អី​ថា ឥឡូវ​គេ​ឲ្យ ៨​ពាន់​ចេញ​ទៅ»

លោក សួន រិនឌី នាយរង​ខុទ្ទកាល័យ​សាលាក្រុង​ភ្នំពេញ ដែល​ទទួល​បន្ទុក​កិច្ចការងារ​អភិវឌ្ឍន៍​បឹងកក់ បាន​មាន​ប្រសាសន៍​ថា សាលាក្រុង​បាន​ទទួល​យក​ញត្តិ​ពី​ប្រជាពលរដ្ឋ​រួច​ហើយ ហើយ​ថា ខាង​សាលាក្រុង​មិនទាន់​អាច​ផ្ដល់​ចម្លើយ​ជូន​ភ្លាម​ទេ។

លោក សួន រិនឌី មាន​ប្រសាសន៍​ថា ៖ «យើង​ទទួល​យក​ពាក្យ​ដែល​គាត់​បាន​ ដាក់​មក​ហើយ ប៉ុន្តែ​អត់ទាន់​បាន​ចម្លើយ​ទេ ព្រោះ​ថ្នាក់​ដឹកនាំ អញ្ជើញ​ទៅ​រៀន​នៅ​កន្លែង​ទីស្ដីការ​អស់​ហើយ»

តំណាង​ប្រជាពលរដ្ឋ​អ្នកតវ៉ា នៅ​តំបន់​បឹងកក់ អ្នកស្រី បេ ផារ៉ុម បាន​ឲ្យ​ដឹង​ថា សាលាក្រុង​ភ្នំពេញ នឹង​ផ្ដល់​ចម្លើយ​ចំពោះ​សំណើ​របស់​ប្រជាពលរដ្ឋ​ក្នុង​រយៈពេល​មួយ​សប្ដាហ៍ ហើយ​អះអាង​ថា ពួកគាត់​នឹង​ឡើង​មក​តវ៉ា​ម្ដង​ទៀត​នៅ​ថ្ងៃ​ច័ន្ទ​សប្ដាហ៍​ក្រោយ បើ​សិន​ជា​គ្មាន​ចម្លើយ ឬ​ដំណោះស្រាយ​ពី​សាលាក្រុង​ភ្នំពេញ​នោះ។

មិន​អាច​សុំ​ការបំភ្លឺ​ពី​ប្រធាន​ក្រុមហ៊ុន ស៊ូកាគូ អ៊ីន របស់​លោក​ឧកញ៉ា ឡៅ ម៉េងឃិន ដែល​ជា​ស្វាមី​របស់​លោកស្រី ជីង សុភាព ហៅ​យាយ​ភូ នោះ​បាន​ឡើយ។

មន្ត្រី​ស៊ើបអង្កេត​របស់​សមាគម​សិទ្ធិ​មនុស្ស​អាដហុក លោក ចាន់ សូវ៉េត បាន​ឲ្យ​ដឹង​ថា វា​មិន​សមស្រប​ឡើយ​ដែល​ការផ្ដល់​ចម្លើយ ឬ​ដំណោះស្រាយ​ត្រូវ​ធ្វើ​ឡើង​ក្នុង​មួយ​សប្ដាហ៍ ក្នុង​ខណៈ​ដែល​ក្រុមហ៊ុន នៅ​តែ​បន្ត​សកម្មភាព​បូម​ខ្សាច់​លុប​បឹងកក់​នោះ។

លោក ចាន់ សូវ៉េត ថ្លែង​ដូច្នេះ​ថា ៖ «ការមក​តវ៉ា​នេះ គឺ​ចង់​ឲ្យ​ពួក​ក្រុមហ៊ុន​ហ្នឹង​ឈប់​បូម​ខ្សាច់​ចាក់​បឹង ប៉ុន្តែ​សាលាក្រុង​អត់មាន​បាន​ចេញ​ហាម​អាហ្នឹង​ទេ បែរ​ជា​ពន្យារ​ពេល​[ដោះស្រាយ]​ឲ្យ​ប្រជាជន ហើយ​បូម​នៅ​តែ​បូម​ដដែល អ៊ីចឹង​ខ្ញុំ​គិត​ថា វា​មិន​សមតុល្យ​ជាមួយ​គ្នា​ទេ បញ្ហា​នេះ»

គួរ​ជម្រាប​ថា រដ្ឋាភិបាល​បាន​អនុញ្ញាត​ឲ្យ​ក្រុមហ៊ុន ស៊ូកាគូ អ៊ីន ធ្វើការ​អភិវឌ្ឍន៍​បឹងកក់​សម្រាប់​រយៈពេល ៩៩​ឆ្នាំ លើ​ផ្ទៃដី​ចំនួន​ជិត ១៣៣​ហិកតា ដែល​ការ​អនុញ្ញាត​នេះ ត្រូវ​បាន​ក្រុម​សិទ្ធិ​មនុស្ស​រិះគន់​ថា បាន​រំលោភ​លើ​ច្បាប់​ភូមិបាល​ឆ្នាំ​២០០១ ដែល​ថា ការប្រគល់​បឹង​ដែល​ជា​កម្មសិទ្ធិ​រដ្ឋ ទៅ​ឲ្យ​ឯកជន គឺ​មិន​ត្រូវ​ហួស​ពី​១៥​ឆ្នាំ​ឡើយ។

ក្រុម​សិទ្ធិ​មនុស្ស​បាន​ឲ្យ​ដឹង​ថា ការអភិវឌ្ឍ​នេះ​នឹង​ប៉ះពាល់​យ៉ាង​ធ្ងន់ធ្ងរ​ចំពោះ​បរិស្ថាន​និង​ប្រជាពលរដ្ឋ ​ប្រមាណ​ពី ៣.០០០ ទៅ ៤.២០០​គ្រួសារ​ដែល​រស់​នៅ​ជុំវិញ​បឹងកក់​នោះ៕

Read more!

កុំនាព្យ

សួន​កំណាព្យ​ខ្មែរ Khmer Poem

2-study-4-khmer.gif

អ្នករៀនដើម្បីជាតិ

ហៃកុមារា

ចូរខំនាំគ្នា

រៀនអក្សរសាស្រ្ត

ចូរកុំរត់លេង

ត្រូវនឹកអៀនខ្មាស

ហាត់អានឲ្យច្បាស់


សរសេរឲ្យត្រូវ ។


រៀនសូត្រឲ្យចេះ

អស់អាថ៌ចំណេះ

កុំឲ្យសត្រូវ

ញាំញីលើក្បាល

ចិរកាលតទៅ

នាំឲ្យអាស្រូវ


ថោកដល់ជាតិទៀត ។


រដ្ឋខ្មែរតូចណាស់

ចូរប្រែក្រឡាស់

រិះរេរកស្នៀត

កុំនៅឡែឡ

ខាតពេលបង់សៀត

នាងអើយខំឆ្លៀត


ទាន់នាងនៅក្មេង ។


ចូរនាងជឿថា

រដ្ឋនឹងថ្លៃថ្លា

ដោយសារនាងឯង

ដែលខំស្វាធ្យា

ដើម្បីចាត់ចែង

តាំងផ្ទះសម្បែង


ឲ្យល្អដូចគេ ។


ន. មោ . ក.ខ

ហាត់អានឲ្យល្អ

កុំនៅទំនេរ

ដីសខ្មៅដៃ

ព្យាយាមសរសេរ

កុំចាំគ្រូជេរ


រៀនសោះគេថា ។


កុំដូចមនុស្សខ្វាក់

តាមកែគេញាក់

ឆ្វេងស្ដាំតាមការ

ពួកជនបែបនេះ

មានក្នុងតម្រា

ថានាំអាត្មា


ទៅរកក្ដីទុក្ខ ។


១.២៣.៤

បូកសងតាមក្បួន

គុណចែកតាមមុខ

កុំធ្វេសប្រហែល

ខំឡើងគ្រប់ស្រុក

ទើបរដ្ឋបានសុខ


រស់រានក្សេមក្សាន្ត ។


អនាគតគឺអ្នក

ដូច្នេះត្រូវស្មគ្រ

កុំទំរន់ប្រាណ

នឿយហត់កុំត្អូញ

យកចេះឲ្យបាន

ខ្លួននាងថ្កើងថ្កាន


ពីព្រោះនឿយមុន ។


ខំគូរសំគូរ

អស់ទាំងគំនូរ

ធ្ងន់ស្រាលខំពុន

ចំណេះនេះហើយ

ដែលនាំនូវគុណ

បុណ្យសក្តិទ្រព្យធន


ដល់ជាតិដល់អ្នក ។


ជំនួញជួញប្រែ

ជាតិគេធ្វើតែ

បន្លំលួចលាក់

បិទភ្នែកខ្មែរស៊ី

ព្រោះជាតិខ្មែរខ្វាក់

នាងអើយគួរភ្ញាក់


ខំរុលទៅមុខ ។


រៀនដើម្បីអ្វី

ដើម្បីទឹកដី

ចូរចងចាំទុក

រដ្ឋកម្ពុជា

កេរិ៍ម៉ែឪពុក

សាងបានជាស្រុក


ដោយសារសាច់ឈាម ។


បើជាតិត្រូវការ

នាងកុំសាវ៉ា

ថយក្រោយទីមទាម

ស្ទុះស្មគ្របំរើ

ឲ្យទាន់ពេលភ្លាម

នោះទើបបដល់ពាម


គឺសុខសប្បាយ ។


ទោះរស់ទោះស្លាប់

ស្រីប្រុសប្រញ៉ាប់

ត្រូវបូជាកាយ

ដល់មាតុភូមិ

កុំបីនឿយណាយ

ជីវិតកុំស្ដាយ


ស្ដាយត្រង់តែជាតិ ។


បើសត្រូវជិះជាន់

ព្រួតតកុំគ្រាន់

វាយវាឲ្យឃ្លាត

កុំដេកផ្សងព្រេង

ត្រូវវាយឲ្យព្រាត់

វាយឲ្យខ្ទាយខ្ទាត់


ចាកពីទឹកដី ។


ត្រូវប្ដូរជីវិត

ស្លាប់រស់កុំគិត

ណានាងប្រុសស្រី

រស់នៅខ្ញុំគេ

មិនប្រសើរអី

ស្លាប់ព្រោះបូរី


ជយោស្លាប់ចុះ ។


បើនាងបណ្ដោយ

ដល់ទៅថ្ងៃក្រោយ

គ្មានបញ្ញាឆ្លុះ

ព្រោះខ្ជិលពុំរៀន

គំនិតតុញតុះ

ដល់ដឹងថាខុស


ចាស់ជ្រុលទៅហើយ ។


ពេលកន្លងទៅ

អ្នកនាងស្រែហៅ

ពុំវិលវិញឡើយ

នៅកមេងត្រូវប្រឹង

កុំធ្វើព្រងើយ

នែអ្នកនាងអើយ


មកទៅ ! មកទៅ ! ។


មកទៅសាលា

នាងកណ្ដៀតក្ដារ

ក្រាបលាម៉ែឪ

បបួលមិត្តភក្តិ

កុំគិតកាក់នៅ

ខំរៀនណាពៅ


អ្នកនាងកូនខ្មែរ ។


ម៉ែឪសប្បាយ

ចិត្តលោកខ្វល់ខ្វាយ

ខិតខំធ្វើស្រែ

នាងសង្វាតរៀន

ឲ្យបានពូកែ

កុំយំឡែឡែ


ខ្មាស់ជាតិជិតខាង ។


គុណគ្រូត្រូវស្គាល់

យប់ថ្ងៃនាងគាល់

ផ្ទិតផ្ទង់សំអាង

គឺគ្រូនេះហើយ

ដែលជួយកសាង

វាសនាសំណាង


ឲ្យនាងរាល់គ្នា ។


ចូរនាងចងចាំ

អស់ទាំងបណ្ដាំ

ខាងលើនេះណា

ព្រឹកស្អែកត្រៀមខ្លួន

ចេញចរយាត្រា

ឆ្ពោះទៅសាលា


ខំសិក្សាអឺយ ។

កើតមកជាមនុស្ស


-កើតមកជាមនុស្ស
កុំរឹងកុំរូស
កុំធ្វើជនពាល
កុំបោក កុំប្រាស
កុំឆ្កឹះកុំឆ្កៀល
កុំដើរតិះដៀល

មិនធ្វើការងារ ។

-កើតមកជាមនុស្ស
កុំលង់កុំលុះ
អំពើពាលា
កុំដើរលួចប្លន់
នោះអន់គ្រប់គ្រា
ចាប់បានវេទនា

ជាប់គុកច្រវាក់ ។

-កើតមកជាមនុស្ស
កុំមានចិត្តទ្រុស្ត
កុំដើរកាប់ចាក់
កុំធ្វើជាចោរ
សាមាន្យអបលក្ខណ៍
គេបាត់លុយកាក់

គេជេរផ្ដាសា

-កើតមកជាមនុស្ស
កុំគិតតែគូស
ផ្លូវខុសនោះណា
លួច គោ គ្របី
ម្ខាស់គេឈឺផ្សា
កុំចិត្តឬស្យា

ប្រហារគេឯង ។

-កើតមកជាមនុស្ស
កុំឲ្យពន្យុះ
កុំដើរលេងល្បែង
កុំផឹកប៉ោឡែ
ដេកដួលគេសែង
គ្រួសារចំបែង

ព្រោះក្រែងខ្លួនស្លាប់

-កើតមកជាមនុស្ស
កុំដើរជជុះ
ឲ្យគេឈឺចាប់
កុំធ្វើអាក្រក់
ថ្ងៃក្រោយគង់យ៉ាប់
កុំអុជអាលប្រាប់

កើតរឿងឈ្លោះគ្នា ។

-កើតមកជាមនុស្ស
ចេះបែងចែកពុះ
គ្រប់ពេលវេលា
ប្រព្រឹត្តតែល្អ
រួបរួមសាមគ្គឺ
នោះទើបយូរយា

ស្គាល់ត្រើយ សុខសាន្ត ។
-កើតមកជាមនុស្ស
ដើរតាមគំនូស
ចាស់ ពី បុរាណ
កាន់យកសីលទាន
ធម៌អាថ៌ជាប់ប្រាណ
ដើរតាមលំអាន

ព្រះ ពុទ្ធប្រដៅ ។


ម៉ែ

-ម៉ែ !ម៉ែ !ម៉ែ !

ពាក្យនេះ

សែនមានន័យ

ព្រះគុណថ្លៃ

ច្រើនអនេក

ច្រើនប្រការ

ជាម្លប់ពោធិ៍

ម្លប់ជ្រៃ

ម្លប់សុខា

ដល់បុត្រា

បុត្រី គ្មានអ្វីផ្ទឹម


-ម៉ែ!អ្នកឱ្យ

គ្រប់វេលា

ទោះថ្ងៃយប់

ឱ្យសព្វគ្រប់

កូនចង់បាន

ទាំងញញឹម

ទោះម៉ែអត់

មិនឱ្យកូន

អស់សង្ឃឹម

ម៉ែញញឹម

ប្រឹងរត់រក

មកឱ្យកូន ។

-ម៉ែប្រៀបដូច

ជាគ្រូពេទ្យ

ចាំរក្សា

ពេលជីវ៉ា

មានជំងឺ

មិនស្រួលខ្លួន

ម៉ែស្វះស្វែង

ទាំងយប់ថ្ងៃ

មើលថែកូន

មិនគិតខ្លួន

ឱ្យតែកូន

ជាសះស្បើយ ។

-ម៉ែប្រៀបដូច

ធនាគារ

របស់កូន

ពេលមាសស្ងួន

កូនត្រូវការ

ដកប្រាក់ហើយ

ទោះម៉ែអត់

មិនប្រកែក

ណាកូនអើយ

ហុចដៃហើយ

ម៉ែបើកឱ្យ

តាមត្រូវការ ។

-ម៉ែអ្នកចង់

ឃើញកូនថ្លៃ

មានក្តីសុខ

ម៉ែរងទុក្ខ

ស្រក់ទឹកភ្នែក

ណាជីវ៉ា

ពេលកូនស្ងួន

មានទុក្ខទោស

ដល់អត្មា

ម៉ែខ្លោចផ្សា

ឱរ៉ាប្រេះ

ហួសពីកូន ។

ម៉ែចង់ឱ្យ

កូនស្ងួនម៉ែ

ជាមនុស្សល្អ

ទោះមានក្រ

ស ខ្មៅ

ណាកូនស្ងួន

បើសិនកូន

ធ្វើអាក្រក់

នោះម៉ែកូន

នេត្រាហូរ

ឥតមានស្បើយ

ល្ហើយឡើយណា។š•››››

សិល្បៈចម្រៀងចាប៉ីខ្មែរ

(បទពាក្យ ៨)

ដោយ មៀច ប៉ុណ្ណ

ឧបករណ៍តន្រីចាប៉ីដងវែង

បូកនឹងសំឡេងចម្រៀងប្រគំ

សូរស័ព្ទកាព្យឃ្លោងពិរោះរងំ

បំពេអារម្មណ៍សក្តិសមស្រស់ស្រាយ ។

សិល្បករខ្មែរពូកែកំណាព្យ

ជួនជាប់ដរា បច្រៀង បរិយាយ

ជារឿងកំប្លែងបានសើចសប្បាយ

ឆ្លងឆ្លើយដោះស្រាយល្បាយល្បងបញ្ញា ។

បើមានដៃគូរច្រើនច្រៀបង្អាប់

សៀតស៊កសាស័ព្ទរ៉ាយរ៉ាប់វោហារ

តបទៅតាមមកខោខំតវ៉ា

សំដីផ្លែផ្កាចំអន់ឡែបខាយ ។

រដូវទំនេររិះរេលំហែ

ពន្លឺព្រះខែចែងចាំងត្រសាយ

អ្នកស្រុកអ្នកភូមិញាតិមិត្តជិតឆ្ងាយ

ហេតុចង់សប្បាយមូលមកជួបជុំ ។

វាតទីដំកង់កណ្ដាលទីធ្លា

យាយតាមីមាកំលោះក្រមុំ ។

ខ្លះឈរអង្គុយកន្លែងសមរម្យ

ចាំស្ដាប់ជិតជុំទ្រហឹងអឺងអាប់ ។

អ្នកច្រៀងតម្រូវទៅតាមបំណង

ស្នើរយោបល់ឆ្លងបំណងអ្នកស្ដាប់

ចង់ស្ដាប់ល្បែងល្បងឬចង់បង្អាប់

ឬមួយចង់ ស្ដាប់ ស័ព្ទរឿងបុរាណ

ព្រលប់ផ្កាយព្រាតអាធ្រាត្រផ្កាយជុំ

សំឡេងរងំចាប៉ីចំណាន

បើកបទបង្គំតាមដោយដើមដាន

គោរព សន្ដានមីងមាយាយតា ។

ចាប់ចូលសាច់រឿងបុរាណកវី

សូរស័ព្ទចាប៉ីផ្សំនឹងវាចា

បន្លឺចម្រៀងក្រអួនវោហារ

ថ្ងូចថ្ងូរវាចាពិរោះជាប់ចិត្ត ។

ត្រង់ឆាកព្រាត់ប្រាសនិរាសគូគាប់

អ្នកស្ដាប់ស្រពាប់ស្រពោនអាណិត

ដល់តួរងគ្រោះបែកបាក់

ស្នេហ៍ស្និទ្ធត្រូវយក្សបង្ខិតបង្ខំទៅឆ្ងាយ ។

ស្រីៗអ្នកស្ដាប់ដែលមានចិត្តទន់

ឃើញតួទារុណឈឺចាចាប់ចិត្តកាយសម្រក់

ទឹកភ្នែកយំយែកសោកស្ដាយ

ស្រណោះអាល័យតួអង្គតួឯក ។

លុះដល់ឆាកប្រយុទ្ធជៀងជាក់

ក្សត្រានិងយក្សខ្លាំងក្លាអនេក

ពលយក្សក្រៃក្រាស់ធំៗចម្លែក

ងងឹតពេញមេឃបាំងសែងសុរិយា ។

កងទ័ពក្រុងមារកត់ត្រាមិន

បាន មិនមែនវាល់ឡានដូចទ័ពមនុស្សា

វាល់នឹងសមុទ្រច្រើនផុតមាត្រា

សាហាវហានក្លាដូចអសនី ។

ខ្លះកាន់លំពែងដាវដំបង

ខ្លះជិះលើខ្នងមហឹសា-ដំរី

ខ្លះជាសេនារេហ៍ពលដើរដី

ខ្លះហិចហោះខ្មីលើអាកាសា ។

ស្រែកហ៊ោសន្ធាប់ញាប់ញ័រប្រថពី

វាសវាត់គ្រវីអាវុធមុតថ្លា

សម្លុតសម្លឹងខឹងនឹងក្សត្រា

ជាអង្គមនុស្សាឫទ្ធិក្លាហៅហាន

អ្នកច្រៀងធ្វើត្រាប់តាមកាយវិការ

ជួនហក់ឆ្លេឆ្លាជួនពើតពើងប្រាណ

គ្រវីចាប៉ីធ្វើតាមលំអាន

យក្សយង់ក្សត្រាប្រហាក្សិណក្ស័យ

ស្ដេចនាំនាងនាថរិលវឹងបិរី

ឆ្លាស់ឆ្លងដងព្រៃជ្រលងបព្វតា ។

រាយរាប់រុក្ខជាតិព្រៃភ្នំក្រំថ្ម

ជ្រោះជ្រង លំអ ដែនអរញ្ញវា

រៀបរាប់សត្វម្រឹគបក្សីបក្សា

រាប់អស់មច្ឆាហែលតាមទឹកហូរ ។

រាប់ទាំងបុប្ផាគន្ធាសព្វសាយ

ភូមរីទាំង ឡាយក្រេបរសពិដោរ

ក្លិនរសាត់ឆ្ងាយភាយតាមវាយោ

ហាក់ដូចជាស្នូរនៃតួរ្យតន្រ្តី ។

ឱ ! កវីខ្មែរពូកែបណ្ដាច់ រចនា

ពាក្យពេចន៍ល្បិចល្បងល្បាញល្បី

ឱ ! អ្នកចម្រៀងច្រៀងលេងសំដី

ដេញភ្លេងបំភ្លៃពិរោះភរិម្យ ។

ឱ ! រាត្រីខ្មែរខែរះភ្លឺថា

រីករាយចិន្ដាអធ្រាត្រដាស់ទុំ

ស្ដែងស្ដាប់ចម្រៀងបំពេសង្គម

បបោសអារម្មណ៍សំងំសុខសាន្ត ។

នាំគ្នាការពារថែវប្បធម៌ជាតិ

កុំឲ្យរវាតទើបជាតិថ្កើងថ្កាន

រក្សាគង់វង្សកេរពីបុរាណត

ទៅសន្ដានរឿង ដរាប អើយ

បំណងរបស់ពុក

.ប៉ាភ្ជួរ ប៉ារាស់កាប់គាស់លី

ខិតខំសំភីរៀងរាល់ថ្ងៃ

បង្ហូរញើសឈាមក្រោមក្តៅថ្ងៃ

ប្រយោជន៍ដើម្បី ប្រពន្ធកូន។

.ខ្លួនប៉ាធានា គ្រប់កិច្ចការ

ចាត់ទុកអាត្មាដូចជាក្បូន

បញ្ជិះចម្លងរាល់រូបកូន

សណ្តោងសណ្តូនដល់ត្រើយនាយ

.ការងារធ្ងន់ស្រាលប៉ាមិនគិត

លំបាកផ្លូវចិត្ត ឬផ្លូវកាយ

ពេលណាឃើញកូនសើចសប្បាយ

ទុក្ខប៉ារសាយ ស្បើយមួយគ្រា

.ប៉ាជមរុញកូនឱ្យបានចេះ

រៀនយកចំណេះចេះវិជ្ជា

សង្ឃឹមថ្ងៃក្រោយ កូនភ្លឺថ្លា

ទីពឹងអាត្មាខ្លួនឯងបាន

.ប៉ាចង់ឱ្យកូនកសាងខ្លួន

ថ្លៃថ្លាមាំមួនណាកល្យាណ

ចំណែករូបប៉ាមិនប៉ុន្មាន

ឥឡូវខ្លួនប្រាណកាន់តែចាស់

.ប៉ាចង់ឱ្យកូនដើរផ្លូវត្រូវ

ព្យាយាមប្រដៅទូន្មានណាស់

ឱ្យស្គាល់ខុសត្រូវ ឱ្យបានច្បាស់

កុំឱ្យប្រទះផ្លូវអបាយ

.ចូរកូនរក្សាវង្សត្រកូល

បងប្អន្អូមិត្តមូល កុំខ្ចាត់ខ្ចាយ

ល្បែងស្រី ល្បែងស្រា ចៀសឱ្យឆ្ងាយ

បាបមិត្តទាំងឡាយកុំពាក់ព័ន្ធ

.ប៉ាចង់ឃើញកូនបានក្តីសុខ

សម្បត្តិស៊ីចុកមានគ្រប់ក្រាន់

បើមានកូនចៅ ប្តីប្រពន្ធ

កុំបីរិះគន់ ទាស់តែងគ្នា

.ឥឡូវកូនប៉ាទាំងឡាយអើយ

ពុកម៉ែចាស់ហើយកូនពុំងា

អ្វី ៗ ផ្ញើលើកូនគ្រប់គ្នា

ជា ប្ញ ពុំជា នៅលើកូន

ស៊ូក្ស័យ

បញ្ឈប់​ហិង្សា

ហិង្សា​មិនមែន​ដំណោះ​ស្រាយ

ហិង្សា​កែ​ក្លាយ​ទុក​សង្រេង

ហិង្សា​បណ្ដាល​ឲ្យ​វង្វេង

ហិង្សា​ជា​ភ្លេង​កើត​វិបត្តិ ។

សូម​មនុស្ស​ចូល​ចិត្ត​ប្រើ​ហិង្សា

ពេល​ខឹង​ពេល​ថារ​ធ្វើ​ឲ្យ​ស្ងាត់

ខំ​ប្រឹង​ដោះ​ស្រាយ​ដោយ​ប្រយ័ត្ន

គេច​ជៀស​វិបត្តិ​ដោយ​ហិង្សា ។

ឈប់​គិត​ហិង្សា​តទៅ​ទៀត

បញ្ឈប់​ឃ្លោង​ឃ្លាត​គ្មាន​មេត្តា

កុំ​ផ្ដល់​ទុក​សោក​ដល់​គ្រួសារ

បញ្ចៀស​ហិង្សា​ព្រោះ​ខុស​ច្បាប់ ។

ប្រពន្ធល្អច្រើនចាញ់ប្តី

ម្ដេច​ប្រពន្ធ​ល្អ​ច្រើន​ចាញ់​ប្ដី តើ​ព្រោះ​ហេតុអ្វី​សូម​នាង​គិត
ប្រពន្ធ​ប្រពៃ​មាន​គំនិត តែងតែ​គន់គិត​អ្វី​ប្រសើរ ។
មិន​ឈ្លោះ​ពេល​ប្ដី​ខឹង​ទោសៈ នៅ​មុខ​ញាតិ​ជាក់​មិន​វាយ​ស្មើ
រើស​វេលា​ល្អ​វិល​មក​ស្នើ ពិគ្រោះ​ផ្លូវ​ដើរ​ដែល​ប្រពៃ ។
រក្សា​កិត្តិយស​មេ​គ្រួសារ មិន​ប្រើ​ហិង្សា​តប​សំដី
ចាញ់​ព្រោះ​អត់​ធ្មត់​អធ្យាស្រ័យ ខុសត្រូវ​អ្វី​ៗ​ពិភាក្សា ។
រស​សម្ល​ឆ្ងាញ់​ត្បិត​ព្រោះ​គ្រឿង គ្រួសារ​រុងរឿង​ត្បិត​ភរិយា
ចេះ​គោរព​ប្ដី​ថ្នម​ចិន្ដា ថ្លៃថ្នូរ​តម្រា​ធម៌​រមណីយ ។
ចាញ់​នោះ​ដើម្បី​សេចក្ដី​សុខ គ្រួសារ​ខ្ពស់​មុខ​ពឹង​នារី
ចេះ​រើស​វេលា​តួនាទី ពិគ្រោះ​បញ្ជី​ពន្លត់​ភ្លើង​ក្នុង ។
យកចេញពី
ដែល​និពន្ធ​ដោយ អ្នក​ស្រី កែវ ច័ន្ទបូរណ៍

ហូលខ្មែរ

បណ្ដាំ​អក្សរ​ខ្មែរ
កើត​បាន​ជា​កូន​ខ្មែរ ខំ​គិត​កែ​ប្រែ​គំនិត
គួរ​សេព​គប់​រក​បណ្ឌិត ឃើញ​ត្រូវ​ពិត​តាម​មាគ៌ា ។
ងើប​មើល​ជាតិ​ខ្មែរ​មូល​មីរ ចូល​សាមគ្គី​ជួយ​រដ្ឋា
ឆោម​ប្រកប​ដោយ​បញ្ញា ជួយ​ស្ដី​ថា​ជួយ​កូន​ចៅ ។
ឈប់​ស្ងៀម​នៅ​មើល​បណ្ដាំ ញឹម​ចង​ចាំ​ពាក្យ​ប្រដៅ
ដឹង​ឲ្យ​គ្រប់​កុំ​ល្ងង់​ខ្លៅ ឋានៈ​ជ្រៅ​ឆ្ពោះ​ទៅ​មុខ ។
ឌុកដាន់​ដាល់​វ៉ៃ​គ្នា​ឯង ឍាល​ឫក​ខែង​ចង់​ស្រុក
ណា​អង្គុយ កុំ​សំកុក តទៅ​ថ្ងៃ​មុខ​ក្រែង​អាស្រូវ ។
ថា​តែ​ធ្វើ មិន​ព្រម​លូក ទាប​ដូច​ទូក​ឬ​សំពៅ
ធាក់​រសាត់​តាម​ទឹក​ទៅ នៅ​មិន​នឹង​មួយ​កន្លែង ។
បើ​បាន​ធំ​គុំ​ស្អប់​តូច ផាត់​កាត់​ខូច​ចេញ​ឲ្យ​ស្ដែង
ពិត​ជា​ប្រុស​ត្រូវ​ប្រឹងប្រែង ភ័យ​ខ្លាច​ក្រែង​កើត​ខ្ញុំ​គេ ។
មក​ខិត​ខំ​ប្រឹង​លក​លៃ យ.រ យំ​រក​ល្បិច​គ្នាន់​គ្នេរ
លប​មើល​ជាតិ​អស់​ផង​គេ វិល​វល់​វេរ​ទៅ​តាម​ខ្យល់ ។
សូម​កុំ​ពឹង​លើ​សំណាង ហាម​កុំ​អាង​ប្រើ​ល្បិច​កល
ឡោម​វាយ​គេ​កើត​រចល់ អស់​ពិភាល់​កើត​ជា​ខ្មែរ ។
ខ្មែរស្រលាញ់ខ្មែរ

ខ្មែរ​អើយ​ខ្មែរ​ខ្ញុំ ខ្មែរ​រង​ទុក្ខ​ធំ ដូច​ភ្នំ​សង្កត់ ជា​ច្រើន​ខែ​ឆ្នាំ ចូរ​ចាំ​ប្រវត្តិ ខ្មែរ​ត្រូវ​ប្រាស​ព្រាត់ យ៉ាង​សែន​ទារុណ ។ បើ​ខ្មែរ​បែក​បាក់ ខ្មែរ​នឹង​គ្រោះថ្នាក់ ដូច​កាល​ពីមុន ធ្លាក់​ក្នុង​រណ្ដៅ ជ្រោះ​ជ្រៅ​សែន​ធ្ងន់ រងទុក្ខ​ផ្ទួនៗ ឥត​មាន​ពេល​ល្ហែ ។ ចូរ​ខ្មែរ​ចាំ​ថា គ្មាន​បរទេស​ណា ពិត​ស្រឡាញ់​ខ្មែរ ជាង​ខ្មែរ​ស្រឡាញ់ ដូច​គ្នា​ជាតិ​ខ្មែរ បង​ប្អូន​ពុក​ម៉ែ មា​មីង​យាយតា ។ ខ្មែរ​អើយ​ចងចាំ សាវតារ​បាន​ផ្ដាំ ឆ្លាក់​ជាប់​ថ្មដា មហានគរ ខ្មែរ​ថ្កើង​យ៉ាង​ណា ព្រោះ​ខ្មែរ​ហាន​ក្លា ខ្មែរ​មាន​សាមគ្គី ។ ខ្មែរ​ស្រឡាញ់​ខ្មែរ ខ្មែរ​នឹង​ពូកែ ផុត​ទុក្ខ​ញាំញី កសាង​ការពារ ជាតិ​ខ្លាំង​គ្មាន​ពីរ បរទេស​មូល​មីរ កោត​ក្រែង​ជាតិ​ខ្មែរ ។ សូម​ខ្មែរ​ក្រោក​ឡើង ប្រឹង​លើក​តម្កើង ពូជសាសន៍​ជាតិខ្មែរ ក្នុង​ស្រុក​ក្រៅ​ស្រុក រួម​គ្នា​ជួយ​ខ្មែរ កុំ​ខ្លាំងពូកែ តែ​ខាង​សម្ដី ។ ព្រះ​សង្ឃ​គ្រហស្ថ បើ​ដឹង​ខ្លួន​ខុស នឹង​ច្បាប់​វិន័យ ប្រញាប់​កែ​ខ្លួន មុន​ពេល​ក្សិណក្ស័យ ក្រែង​ធ្លាក់​អវិចី ព្រះ​ប្រោស​មិន​រួច ។

មិត្តល្អជួយគ្នាក្នុងគ្រាមានទុក្ខ

មិត្ត​ល្អ​ក្រ​ណាស់ បើ​ជួប​ប្រទះ ប្រឹងប្រែង​ជួយ​គ្នា បើ​មិត្ត​មាន​ទុក្ខ ខិត​ខំ​ម្នីម្នា ប្រវេប្រវា ឱ្យ​រួច​ទុក្ខ​ធំ។ បើ​មិត្ត​មាន​ភ័យ គួរ​គិត​លក​លៃ ជួយ​ដោយ​មនោ​រម្យ កុំ​នៅ​បង្អង់ ជួយ​ដោយ​សុខុម ឱ្យ​បាន​ចម្រុង​ចម្រើន​តទៅ។ នេះ​ហៅ​មិត្ត​ល្អ រក​បាន​ដោយ​ក្រ ដែល​ជា​ស្រឡៅ នាំ​កើត​ក្ដី​សុខ ឥត​មាន​ហ្មង​សៅ តែង​ចង្អុល​ផ្លូវ សុភមង្គល ។ ទេវតា​ឱ្យ​សុខ ត​រៀង​ទៅមុខ មិន​ដែល​មាន​យល់ នៅ​រឿង​ទុក្ខ​ភ័យ ដែល​ជា​អកុសល នាំ​កើត​មង្គល អស់​មួយ​ជីវិត ។ បើ​ទៅ​ទីណា អស់​បងប្អូន​ណា គេ​ចូលចិត្ត​ពិត គេ​កោត​សរសើរ ទាំង​ឆ្ងាយ​ទាំង​ជិត ស្និត​ស្នាល​ស្គាល់​មិត្ត ទទួល​រាក់​ទាក់ ៕

ជួយគ្នាក្នុងគ្រាមានអាសន្ន

បពិត្រ​សប្បុរស​ជាតិ​ខ្មែរ​ប្រុស​ស្រី ក្នុង​ក្រៅ​បុរី​រួម​ឈាម​ខេមរា ពូជ​អ្នក​អង្គរ​ធ្លាប់​ល្បី​អស្ចារ្យ កសាង​រដ្ឋា​ចម្រើន​ល្បាញ​ល្បី ។

ឥឡូវ​ធ្លាក់​ខ្លួន​កម្សត់​អត់​ឃ្លាន ខ្លះ​ដើរ​សុំទាន​ឆ្លង​ផុត​ដែន​ដី អ្នក​ផង​មើល​ងាយ​ដូច​ជា​ទាសី បាយ័ន​ស្ទើរ​ក្ស័យ​ព្រោះ​អី​ខ្មាស​គេ ។

ពេល​នេះ​កម្ម​កាច​កំណាច​ធម្មជាតិ ឱ្យ​យើង​ឃ្លៀងឃ្លាត​រងទុក្ខ​រឹត​ទ្វេ ម្ដង​គ្រោះ​រាំង​ស្ងួត​ម្ដង​ជន់​ទន្លេ លិច​គ្មាន​សល់​ទេ​មនុស្ស​សត្វ​រុក្ខជាតិ ។

ឱ!ព្រះ​វិហារ​រងា​ដួង​ចិត្ត រស់​ទាំង​ភ័យ​ភិត​ត្បិត​ឆ្ងាយ​មិត្ត​ញាតិ ក្រចេះ​ស្ទឹងត្រែង​ទ្រូង​តឹង​ចង្អៀត ស្វាយ​រៀង​កុំ​ឃ្លាត​ចាក​ព្រំ​សីមា ។

កំពង់​ធំ​កុំ​តូច​ខូច​ឈ្មោះ​ខ្ញុំ ប៉ុល ពត បង​ធំ​ឱ្យ​រាស្ត្រ​ខ្លោច​ផ្សា កំពង់ចាម​បាន​ចិត្ត​ដ្បិត​ស្ដេច​តា ស្មោះ​នឹង​ខេមរា​ដូច​ស្នេហ៍​ទុំទាវ ។

ព្រៃវែង​កុំ​ខ្លី​រួញ​ដូច​កណ្ដាល កំពត​កុំ​ចាល​ចាញ់​ទឹក​រលក កោះកុង​អ្នក​កុំ​គិត​ដូរ​ជម្រក កំពង់សោម​លក​លៃ​ទារ​ពន្ធ​ដារ ។

អូរ​ជ្រៅ​កុំ​រាក់​លាក់​បាត់ដំបង យាយ​យ៉ាត​មើល​ផង​ត្បូង ប ភ្លឺ​ថ្លា សៀម​រាប​អ្នក​កុំ​ឃើញ​តែ​ដុល្លារ ខំ​ថែរក្សា​កេរ​អង្គរ​ផង ។

រតនគិរី​មណ្ឌល​គិរី ភ្នំពេញ​មូល​មីរ​កុំ​ភ្លេច​រោគ​ឆ្លង តាកែវ​ភ្នំ​ដិន​ថែ​ព្រះសង្ឃ​ផង គ្រាន់​ធ្វើ​បុណ្យ​ផ្សង​ចម្លង​សទ្ធា ។

គ្រប់​ខេត្ត​ខណ្ឌ​ក្រុង​ប្រុង​ប្រៀប​ស្មារតី ការពារ​គ្រោះ​ភ័យ​កំណាច​ព្យុះ​មារ មេត្តា​ចេះ​ជួយ​យក​អាសា​គ្នា បង​ប្អូន​មីង​មា​ពុក​ម៉ែ​យាយ​តា ។

ក្នុង​ស្រុក​ក្រៅ​ស្រុក​ពូជ​ពង្ស​ជាតិ​ខ្មែរ វេញ​គ្នា​ដូច​ខ្សែ​ចង​ដំរី​សា កសាង​ការពារ​ជាតិ​ឱ្យ​ខ្លាំង​ក្លា តាម​បែប​ដូន​តា​អង្គរ​រុងរឿង ។

ដូងមួយធ្លាយ

ផ្លែដូងមួយធ្លាយច្រុះលើដើម មានចំនួនច្រើនយ៉ាកនឹងរាប់
មានតក់មាននាឡិមានគួរគាប់ មួយធ្លាយជ្រុះជាប់តាមវាសនា។
ដូចជាពលរដ្ឋក្នុងនគរ មានខូចមានល្អគរខេមរា
កូនខ្លះបំផ្លាញ ខ្លះរក្សា ខ្លះទៀតប្រាជ្ញា ខ្លះក៏ល្ងង់។
ចៃដន្យដូងស្អុយមានតិចតួច ដទៃមិនខូច មិនគម្រង់
មួយធ្លាយខូចមួយមិនលិចលង់ ដូងល្អជួយយោងផលចំការ។
មិនខុសពលរដ្ឋក្នុងនគរ ភាគច្រើនពលល្អថែខេមរា
ថ្វីបើបុត្រខ្លះចិត្តទោសា គង់ជាតិភ្លឺថ្លាព្រោះបុត្រល្អ។
ឃើញស្អុយមួយផ្លែកុំអាលទ្រាន់ នៅផ្លែរយពាន់ផលបវរ
បុត្រមួយខួរស្អុយ ច្រើនទៀតល្អ គង់នាំនគរឆ្ពោះជ័យអើយ ។



Read more!

.0.

.0.

 

we are khmer buriram

Khmer Mystery - Funan (The Lost City) part 1

Cambodian Genocide - Pol Pot and the Khmer Rouge

I knew Pol Pot- 28 Jan 08- Part 2